آقچه ده به یرم

بوگون 20 /09 / 2009 یک شنبه مبارک روزه هیتی. روزه هیتی ، قربان هیتی ، نوروز کبی به یرملر خلقیمیز تمانیدن مینگلب ییلدن بیری یشه تیلیب کیلماقده بو به یرملردن هر بیریده خلقیمیزنینگ گوزل قدریتیلریدن بولمیش مهمانپرورلیک ، صمیمیت ، قوشنیلرگه حرمت ، باله لرگه شفقت ، یاشی اولغلرگه احترامنی کوره میز. روزه هیتی هر تورک ایلیده بولگنی کبی آقچه ده هم اوزیگه خاص بیر هواده اوته دی. روزه به یرمنی کوپ خصوصیتلری بار اولردن بعضی لریگه قسقه توخته لیب اوته میز. روزه به یرمی رحمت و مغفرت آیی بولگن مبارک رمضان آیی دن سونگره اوچ گون بوییچه نیشانله ندی.

روزه نینگ سونگی کیچه سیده ایرککلر – ایال ، قیز – باله همه قوللریگه خنا یاقه دیلر. قیزلر و ایاللر ایکی قوللینی خنا بیلن بیزه یدیلر باله لر و ایرککلر ایسه چپ قولینینگ اووچ ایچیگه دایره شکلیده خنا یاقه دیلر. ایلک گون ایرته لب همه حمام قیلیب بو به یرم اوچون تیکتیرگن کوینک لرنی کییب عطرلر سوریب ساچ و سقال لرنی تره ب جامع مسجدلر گه  کیته دیلر. اوشبو گون جامع مسجدلر تولیب تاشه دی ، ایکی رکات هیت نمازین سونگ هر کیم بیربیرلرینینگ به یرمنی قوتله یدیلر. آقچه شهریده کی بوتون جامع مسجدلرده به یرم نمازی اوقیلدی. حضرت محمد "ص" جامع مسجدی ، ابوبکر "صدیق" جامع مسجدی ، نور خدا جامع مسجدی ، عمر "فاروق" جامع مسجدی ، رحیم "قشقه" جامع مسجدی ، و آق مسجد ده هر ییل بولگنی کبی دیک به یرم نمازی اوقیلدی.

بو به یرم اویلر یخشی ایس بیرسین دیب عنبر لر یاقیلدی ، دسترخان لر ایسه تورلی نعمت لر بیلن بیزلدی به یرم کونلریده ایاللر بیر اویده دسترخان یازیلسه ایرککلر اوچون مهمانخانه ده دسترخان تیار بوله دی.

قیزلر ، باله لر و ایرککلر اوچ گون به یرم ده قوشنی لر قوم قرینداشلر و دوستلرنینگ اوییگه باریب به یرم لشه دیلر ایاللر ایسه اوچ به یرمدن سونگ کیزه دیلر.

به یرمده بیربیرلری بیلن دشمن بولیب یوریگن انسانلرنی یره شتیره دیلر. کسل لرنی حال احوالنی سوره ببه یرمنی قوتله یدیلر.

آقچه دن شهرالله بیک